ليش الصمغ القوي ما يلزق داخل الأنبوب؟‎

يعني حاقد على كل شي ما عدا علبته يعني مثلاً؟ وليش يبيعونه بأنابيب نتفه صغيره؟

 الصمغ القوي شلون يكون سائل حده أول ما نفتح العلبة، وبس يطلع من الأنبوب نشوفه ينشف ويلزق بسرعة على كل شي، حتى على طرف الأنبوب نشوفه يخرّب على الغطا، زين ليش يعني؟ شمعنى ما يلزق داخل؟

الجواب أقدر ألخصه بكلمة: الماي !

الله يسلمكم الصمغ القوي مكون من مادة كيميائية اسمها إيثيل سيانو أكريليت (ethyl cyanoacrylate) ، هالمادة تكون سائلة ومحفوظة عدل بأنبوب صغير، إذا طلعت هالمادة من علبتها وتعرضت للهوا تتفاعل كيميائياً مع الرطوبة –أو الماي– الموجود في الهوا، تقريباً كل مكان حتى لو حسيته ناشف راح تلقى فيه نسبة من الرطوبة بالهوا أو على الأسطح حتى لو ما نحس فيها. داخل العلبة طبعاً مافي أي رطوبة او ماي عشان تبقى المادة سايله ما تنشف.

من جذي طرف الأنبوب دايماً يتيبّس عليه الصمغ بعد الاستخدام لأن التفاعل سريع. والمشكلة هالتفاعل السريع في طرف الأنبوب يخرّب عالمغطا ما تتصكر عدل، وبعد فتره تشوف علبة الصمغ صارت قاسية شوي مو سائلة مثل أول ما شريتها، مع تكرار الاستخدام تبدي الرطوبة تتسرب لداخل العلبة أكثر وأكثر ويبدي كل الصمغ داخل يتفاعل، زيد عليه تلقى الصمغ اليابس على طرف الأنبوب يخرب على إغلاق المغطا بكل مرة تستخدمه والرطوبة تتسرب أكثر وأكثر… وهكذا.

بسبب هالمشاكل كلها في خواص الصمغ شافوا إذا باعوه بعلبة كبيرة راح تخترب الكمية بسرعة والناس تتحلطم ، يعني واحد يشتري أنبوب كبير من هالصمغ كلها مرتين يفتحه خلاص يخترب وينشف، قالوا نبيعه على أنابيب صغيرة وبس.

أتوقع هم السالفة تجارياً مربحة أكثر لهم ، يعني مثل عصير KDD لما سووا العلب الصغيرة حق عصايرهم، العصير بروحه بهالكمية الصغيرة أكيد رخيص حيل، بس تعليبه بهالحجم يعطيه قيمة أكبر بعيون الناس يخليهم يبيعونه بسعر فيه نسبة ربح عالية حتى لو استرخصنا العلبة … حسب ما أذكر العلبة الصغيرة بـ80 فلس كويتي، فكر فيها ترى واااايد غالي على هالكمية !!

أختم الموضوع بقصة شلون اكتشفوا الصمغ القوي بالصدفة، سنة 1942م أيام الحرب العالمية الثانية مجموعة علماء كانوا يحاولون يصنعون بلاستيك صافي عشان يستخدمونه بعدسات لنيشان البنادق، التجارب كانت فاشلة، ليش؟ أنا أقول لكم ليش: لقوا المواد كلها تلزق ببعض حيل  لووول، العلماء قالوا ماكو فايدة وطفوا الليتات وراحوا بيوتهم .

عالم واحد من من مختبرات كوداك – Kodak Laboratories اسمه دكتور هاري كووفر – Dr. Harry Coover قال خل آخذ هالمادة اللي تلزق واسويها صمغ قوي… وقام سوقه حيل !

هالدكتور اليوم موجود وعمره 93 سنة، الرئيس أوباما كرّمه الشهر اللي فات (7 نوفمبر 2010م) بميدالية وطنية للتكنولوجيا والإبداع – National Medal of Technology & Innovation بس عشان اكتشافه للصمغ القوي هذا، بل علييييييه ! هذي صورته:

شفتوا شلون اكتشاف صغير مثل هذا يسوي بلاوي ؟

لا والأخ صاده بالصدفة؟

شفتوا شلون كان موجود جدام درزن علماء بس محد انتبه له إلا هذا وطلع فيها؟

قصيدة سلطان الهاجرى فى الكويت

يسعد مساكم من الاعماق شعب وبلد ....ويليه فحوى رسالتنا وعنوانها
الله يرحمك ياجابر ويرحم سعد ....ويعز أمير البلد ويذل عدوانها
لعل عين(ن)ماهيب تحبها للرمد ....درة شعوب الخليج وقرة أعيانها
هذي كويت الثقافة والرخى والرغد ....اللي رمينا عمايمنا على شانها
نهار صدام أخوهدلا بجيشة حشد ....في ليلة(ن)خانت الجاره بجيرانها
واستيقظ الشيخ جابر وانتخى واستعد ....نخوة بطل هزة العارض وضلعانها
قال الكويت الحبيبة روحت يافهد ....ولاغيرك أحد(ن)يبشرني بعقلانها
قال احتزم بي وانا والله أحزام السعد ....لاقلت كلمه تشوف العين برهانها
واخذ الوعد من عصامياً صدوق الوعد ....دعوى(ن)يراهن عليها يكسب أرهانها
وخطب على شاشة التلفاز يوم الأحد ....ووقد على الحرب شعلتها ودخانها
الارض جمر ولهب والجو برق ورعد ....وأم المعارك يدك الجيش ميدانها
لاكبرت المشكله والشر قام وقعد ....ماتغرق الباخره والفهد ربانها
ماحال دون الأسود ألا عرين الأسد ....نهار صومر ومكتومي بفرسانها
وطى جبروت روس(ن) مايوطيها أحد ....ونزع عن روس هيبتها وطغيانها
يصول صولة حصان وهبدته لاهبد ....ترج دم القلوب ودم شريانها